Litla félagið með stóra hjartað!

Í dag er stór dagur í íslenskri knattspyrnusögu. Stjarnan tekur á  móti Inter Milan. Í sögulegu tilliti er Stjarnan ungt félag stofnað 1960. 1983 var liðið í neðstu deild og þá var ákveðið að stefna uppávið.  Á þessum árum var félagið nú ekki mjög sterkt. Minnist þess eitt árið að þá hafði verið ákveðið að 6 flokkur fengi að fara á Tommamótið i Eyjum, sem nú heitir Skeljungsmótið. Stjórnin var mjög veik og þjálfarinn ákvað að nenna ekki að fara til Eyja. Þá komu til mín afar daprir strákar og ég féllst á að fara með þá til Eyja. Það voru ekki til neinir búningar, en mér sagt að þeir yrðu til fyrir mótið og kæmu með flugi. Undirmeðvitundin sagði mér að fara niður í Stjörnuheimili og safna saman öllum gömlum búningum og taka með til vonar og vara. Þeir búningar voru af misjöfnum stærðum og lit, og með mismunandi auglýsingum. Það fór svo að engir komu búningarnir og þarna spiluðum við í ,,fjölbreyttum“ búningum með auglýsingum frá Garða Héðni, Fálkanum, Frigg, og Sjóvá. Það var gaman í Eyjum eins og alltaf, og strákarnir stóðu sig eins og hetjur.  Það voru allir stoltir af góðum árangri í Eyjum.  Þegar heim var komið fundaði ég með foreldrum og helstu forráðamönnum. Ég sagði frá ferðinni og leikjunum, en svo sagði ég þeim frá því að eftir  hátíðarkvöldið í Eyjum hafi  strákarnir komið til mín og sagt við mig. ,, Veistu hvað strákarnir eru að spyrja okkur?  Jú, hvort við séum svo fátæk í Garðabænum að við höfum ekki efni á að eiga alvöru búninga".

Í næsta leik voru það mjög  stoltir strákar sem gengu til leiks í stórglæsilegum búningum, sem sá eðalmaður Páll Bragason í Fálkanum hafði komið með færandi hendi.

Þetta eru strákarnir í Silfurskeiðinni, með alsnægtirnar, sem við sem að komum, fréttum um af afspurn.

Í dag er tíminn til þess að njóta. Þeir Rúnar Páll og Brynjar Björn mundu stýra strákunum á móti einu öflugasta liði heims, það er bara tími til þess að njóta. Til hamingju með daginn. 

 

 

 

Margir sem styðja Stjörnuna (Myndband)

Athugasemdir

[Már Elíson, 21.8.2014 kl. 00:28]

Frábær, myndrænn og fróðlegur pistill hjá þér, Sigurður - Þó að farið hafi sem fór í kvöld, þá var þetta

stórkostlegt hvað þeir Stjörnu-áhugamenn stóðu vel í atminnumönnum í Inter. - Leikmenn Inter eru með

tugmilljónir í laun á mánuði, en Stjörnumenn mæta til sinnar vinnu glaðir í bragði á morgun, vitandi að það

er til fyrir búningum hjá gjaldkera Stjörnunar næstu áratugina. - Til hamingju Stjörnumenn, og konur.

[Helga Kristjánsdóttir, 21.8.2014 kl. 01:08]

Ég man vel eftir því þegar Yngvi Guðmundsson,Bliki stofnaði Stjörnuna. Þá var Garðabær að byggjast upp,minnir að hann hafi þá verið hreppur,eins og öll bæjarfélögin í kringum RVK.,sem eru orðin myndarlegir Kaupstaðir í dag. Öll eiga þau svipaða sögu um upphaf sitt,sem tekur örskotsstund að mynnast. Það er því eins og álfadís hafi veifað töfrasprota yfir svæðið í Garðabæ og glæsileg mannvirki sprottið upp.

[Sigurður Þorsteinsson, 21.8.2014 kl. 13:45]

Takk fyrir Már. Helga ef ég þekki söguna rétt, þá var félagið fyrst stofnað undir stjórn Braga Friðrikssonar, en var með afar skrikkjótta starfsemi fyrstu árin. Þá kom vinur minn Yngvi Guðmundsson sem var með eitt blátt hólf í hjartanu og annað grænt, eins og fleiri :), sveitarfélagið hét Garðahreppur. Síðar var nafninu breytt í Garðabæ. Nágrannabæjarfélögin Kópavogur og Garðabær hafa bæði vaxið og dafnað vel á undanförunum árum, bæði hvað varðar mannvirki, vegi og mannlíf.