Maður ársins 2010

Nú þegar líða tekur að áramótum er ekki úr vegi að finna mann ársins 2010. Marinó Njálsson kemur strax upp í hugann hjá mér. Baráttumaður í Hagsmunasamtökum heimilanna, sem reyndi eftir mætti að fara með mál án æsings og uppþota. Hagsmunasamtök heimilanna áunnu sér virðingu með þessari leið, stjórnvöld voru einfaldlega í vondum málum.

Þegar líða fór á árið kom útspil austurblokkar velferðarstjórnarinnar og tveir fjölmiðar svöruðu kallinu. Persónuleg fjármál Marinós voru gerð tortryggileg og hann dró sig í hlé frá stjórnarstörfum hjá Hagsmunasamtökum heimilanna. Þöggunaráætlun stjórnvalda náði þó ekki tilætluðum árangri því fjölmargir komu fram og lýstu fyrir stuðning við Marinó. Hér á blogginu heldur hann áfram og það segir mér svo hugur að stjórnvöld muni gjalda fyrir ofbeldi sitt þegar í upphafi næsta árs. 

Lýðræði er oft metið eftir því hversu auðveldlega fólk getur sett fram gagnrýni og nýjar áherslur í skoðunum án þess að vera refsað fyrir í einhverju formi. Slíkt refsingarferli er kallað þöggun. Svo verðum við að meta hvert og eitt hvort slíkt þekkist í okkar þjóðfélagi. 

Athugasemdir

[Birgir Viðar Halldórsson, 23.12.2010 kl. 10:48]

Sammála, Marinó Njálsson kemur fyrst upp í hugann þegar minnst er á hver er maður ársins 2010.

[Björn Birgisson, 23.12.2010 kl. 12:19]

Ekki forsetinn?

[Sigurður Þorsteinsson, 23.12.2010 kl. 13:50]

Þú segir nokkuð Björn. Ólafur neitaði að skrifa undir lögin um Icesave og gaf þjóðinni tækifæri á að kolfella samninginn. Tek undir með þér Ólafur er líka mjög verðugur fulltrúi.

[Sigurbjörg Eiríksdóttir, 23.12.2010 kl. 20:16]

En ofuramman í Sandgerði? Hún fékk með sér þvílíka bylgju samúðar og réttlætis!

[Friðrik Hansen Guðmundsson, 23.12.2010 kl. 23:00]

Ég er sammála Birni af þrem ástæðum:

• Ólafi Ragnar var í janúar veitt en virtustu verðlaun sem veitt eru í Asíu, indversku Nehru verðlaunin og varð þar með þriðji Evrópiubúinn til að hlotnast sá heiður. Hinir tveir eru Olof Palme og Helmut Kohl.
• Ólafur Ragnar neitaði í janúar að skrifa undir Icesave lögin og með því hefur hann líklega sparað þjóðinni 400 til 500 milljarða
• Svo hefur maðurinn hreinlega farið á kostum í þessum mikla fjölda sjónvarpsviðtala og blaðaviðtala sem hann hefur farið í frá því hann synjaði lögunum staðfestingar.

Aldrei hef ég kosið Ólaf en ætla að gera það nú og kjósa hann mann ársins og þar með þakka honum fyrir hans þátt í þessu Icesave máli.

[Sigurður Þorsteinsson, 24.12.2010 kl. 02:42]

Ofuramman verður að fá sérstaka heiðursviðurkenningu, maður ársins er of lítil viðurkenning.