Kúluólán.

Fyrir nokkrum árum tók ég eftir því að líkamsbrennslan hjá mér tók skyndilega að veikjast. Hafði aldrei getað fitnað, en nú virtist allt sem ég boðaði breytast í forðabúr sem safnaðist á magann á mér. Smá saman sætti maður sig við að bera eitt kíló og síðan annað. Það var svo fyrir nokkrum vikum að ég rakst á mynd, þar sem ég stóð við hliðina á konu sem var komin 7 mánuði á leið. Mikið óskaplega var konan grönn og mittismjó. Tók þá ákvörðun að greiða þetta kúluólán mitt og þarf sannarlega að vinna fyrir afborgununum.

Engin megrun, ekkert nart, engir kúrar. Bara smá aðhald, borðað í alla mata, en bara minna. Svo ræktin. Fyrstu vikuna léttist ég ekkert, afskaplega lítið þá næstu, framfarir þá þriðju og sú fjórða lofar mjög góðu. Er farinn að sjá tölur sem ég hef ekki séð áður. Setti mér markmið fram að jólum, hafði það raunhæft. 21 dags tíminn er liðinn, og þetta er orðið léttara. Kúlulánið verður ekki greitt upp fyrir jól, en þá hefur a.m.k. verið greitt duglega inn á höfuðstólinn.

Athugasemdir

[Arnar Geir Kárason (IP-tala skráð) 24.11.2009 kl. 13:20]

Já, þú ert ekki einn um að hafa svona kúluólan.  Ég er kominn með dráttarvexti, og dráttarvaxtavexti á mitt kúluólán.  Það er spurning hvort maður þurfi ekki að fara að athuga hvaða úrræði séu til í stöðunni.

[Sigurður Þorsteinsson, 24.11.2009 kl. 14:00]

Arnar átt þú við greiðsluaðlögun?

[Arnar Geir Kárason (IP-tala skráð) 24.11.2009 kl. 14:03]

Já eitthvað í þá áttina getur þú frætt mig eitthvað um slíkt ?