Sanngjörn hækkun á aðgangseyri í sund!

Við eigum afar glæsilegar sundlaugar og okkur finnst sjálfsagt að það kosti lítið að fara í sund. Eftir hrun er hefur gjaldið ekki hækkað miðað við verðlag almennt. Sjálfsagt vilja yfirvöld halda verði á slíkri þjónustu þannig að almenningur geti farið í sund.

Ég fer reglulega í sund og það vekur athygli mína að þar eru æ fleiri útlendingar. Erlendir gestir mínir fara yfirleitt daglega á sundstaðina og eftir hrun hafa þeir orð á því að sundlaugargjaldið sé óeðlilega lágt. Hækkun á verðinu mun ekki minnka aðsókn ferðamanna svo neinu nemi. 

Hugmyndir um að hækka verð í sund á stökum miðum eru fyllilega eðlilegar. Það er engin ástæða til þess að íslenskir skattborgarar niðurgreiði sundferðir fyrir erlenda ferðamenn. Afsláttarkort á kennitölu er þá hægt að hafa hagstæð ef vilji er til þess að hafa lægra gjald til Íslendinga.

Ef þessi hækkun gefur rými til lengri opnunartíma eða viðbótarþjónustu er það að sjálfsögðu frábært.  

Athugasemdir

[Einar Guðjónsson, 2.11.2011 kl. 09:21]

Það liggur ekkert fyrir um að sundferðir í sundlaugar í almannaeigu séu niðurgreiddar, a.m.k. ekki í Reykjavík. Hugmyndir um að hækka verð á stökum miðum eru óeðlilegar enda ekki á færi fátækra að punga út 30 þúsund krónum í einu lagi til að greiða '' sund'' árið fyrirfram. Sýnist hugmyndin koma frá fólkinu sem borgar einmitt ekkert í sund en í Reykjavík fá starfsmenn borgarinnar '' ókeypis'' í sund.Að okra á útlendingum tíðkast ekki nema á Íslandi og erlendis eru t.d. ekki helmingi hærri gjöld fyrir íslendinga í almenningsvagna.

[Sigurður Þorsteinsson, 2.11.2011 kl. 10:09]

Einar rekstur sundlauganna hefur verið erfiður þrátt fyrir framlag frá Borginni og þá er ekkert tekið tillit til mannvirkjanna. Þannig að hver sem kynnir sér rekstur sundlauganna sér starx að um heilmilkla nirðurgreiðslu er að ræða. Við styðjum við íþróttaiðkun og það er ekkert óeðlilegt að við styðjum íbúana til sundiðkunar. Afsláttarkort þurfa ekki að vera árskort, það eru líka til 10 skipta kort.

Víðast hvar á Vesturlöndum er verið að auka kostnaðarvitund fólks með því að láta það borga það sem hlutirnir kosta, en síðan styðja þá sem með þarf. Varðandi sund þá er það orðið mjög ódýrt í samanburði við nágrannalöndin.

Við eigum að laða til okkar ferðamenn sem eru tilbúnir að borga eðlileg verð og þar sem við þurfum að takmarka ferðamenn í framtíðinni eigum við ekki að selja þjónustuna á undirverði. 

[Jón Atli Kristjánsson, 2.11.2011 kl. 16:35]

Veit að þú hefur yfirgripsmikla þekkingu á þessum rekstri. Minni á í þessari umræðu tvennt. Verðteygni eftirspurnar og föstum og breytilegum kostnaði.

Hefur það verið rannsakað hver áhrif hækkunar gjalda hefur á aðsókn. ( teygni ) Hver er fjöldi útlendinga sem sækir sundstaðina og sem hlutfall af heild. Ég hefði haldið að fastur kostnaður við rekstur sundstaða sé mjög hár ( 90% ) Tel að m.v. stöðuna í dag, hafi Einar margt til síns máls. Veit jafnframt að þetta er stór pakki fyrir sveitarfélögin.

[Sigurður Þorsteinsson, 2.11.2011 kl. 18:03]

Heill og sæll Jón

Ég vil taka það skýrt fram að ég er ekki á því að almennt verð í sund verði stórhækkað. Það er hægt að hækka miðaverð en halda verðinu niður með miklum afslætti á 10 miða korti, mánaðarkorti  eða 3 mánaða korti.

 Góður vinur minn var að koma frá Noregi og þar kostaði 1700 kr í sund, í laug sem ekki stóðst neinn samanburð við laugar hér. 

Aðgangseyir dugar engan veginn til þess að mæta breytilegum kostnaði. Á niðurskurðartímum er því sú leið sem er til skoðunar, mjög vel hugsuð. Þannig væri hægt að auka þjónustuna en ekki minka.