Tækifærinu til leiðréttingar á skuldum heimila og fyrirtækja endanlega glatað?

Fyrir kosningar kom Framsóknarflokkurinn fram með 20% fyrningarleiðina. Bankarnir höfðu fengið niðurfellingu af erlendum lánum og því kom upp tækifæri á að rétta skuldastöðu heimilanna og fyrirækja  að hluta. Hugmyndin var óvenjuleg, en aðstæður eru líka óvenjulegar. Tryggvi Herbertsson og Lilja Mósesdóttir tóku undir þessa frumlegu hugmynd, þó með sínum áherslum. Ráðamenn höfnuðu tillögunni hins vegar, og að því virtist af valdahroka einum saman. Árni Páll Árnason félagsmálaráðherra taldi aðgerðir ríkisstjórnarinnar duga varðandi skuldsett heimili og nefndi m.a. greiðsluaðlögun. Nú nokkrum mánuðum síðar kemur hann til baka og vill taka málið upp. Það er virðingarvert, að sjá að sér. Að öðru leiti ríkir þögnin. Hins vegar  fréttist af því að verið sé að selja bankana útlendingum. Sem þýðir hvað? Jú, tækifærinu til leiðréttinga er glatað. Ef bankarnir eru komnir í eignarhald útlendinga, þá er ekki spurning um hvað sé réttlæti gagnvart heimilunum og fyrirtækjunum. Þá er spurt, hvað gagnast eigendum bankanna. Ef bankarnir eru seldir útlendingum, verður engin leiðrétting. Leiðréttingin verður ekki tekin eingöngu úr ríkissjóði.

Athugasemdir

[Tómas Ibsen Halldórsson, 5.9.2009 kl. 18:40]

Ég er þér hjartanlega sammála Sigurður, það er með hreinum ólíkindum að ríkisstjórnin ætli að glutra niður því eina alvöru tækifæri til að koma til móts við heimilin.  Velferðarstjórnin er ekki að hugsa um velferð almennings, heldur velferð einhverra allt annarra.  Sorgarsagan hófst s.l. haust og sorgarsagan heldur áfram.  Það er ekki verið að bjarga Íslandi, hverjum er ríkisstjórnin að bjarga ?  Ég skil þetta ekki.

[Héðinn Björnsson, 6.9.2009 kl. 01:31]

Það má leiðrétta með því að leiðrétta vísitölu neysluverðs og lýsa yfir að gengistryggingin brjóti í bága við íslensk lög og að breyta verði þeim lánum í verðtrygð lán frá lántökudegi.

[Sigurður Þorsteinsson, 6.9.2009 kl. 11:18]

Héðinn það er langt síðan að ábending kom fram að gengislánin standist ekki lög. Stjórnvöld hafa ekkert með það gert. Verið er að fá dóm um gengistryggð lán fyrir dómstóla. Vísitölutenging lána er svo annað mál sem þarf vissulega að skoða. Það sem er alvarlegt er að ef á að selja bankana áður en gengið hefur verið frá skuldamálum heimilanna.

Tómas ég er sammála þér núverandi ríkisstjórn hefur sett ESB og Icesave sem forgangsverkefni, það er ekki velferðarstjórn.