Yfirgengilegt hatur!

Af hverju þetta hatur? Nýlega hitti ég mann á miðjum aldri í verslun. Hann spurði afgreiðslumanninn sem var nýbúi á íslensku, en viðkomandi gat ekki svarað. Þá ítrekaði maðurinn spurninguna á íslensku en eftir nokkrar tilraunir þýddi ég fyrirspurnina og afgreiðslan gekk bara vel fyrir sig. Bara kurteisi. Á leiðinni út úr búðinni kom í ljós að samferðarmaður minn gat talað ensku en vildi það ekki og svo kom yfirgengileg ræða um útlendinga. Ég sagði: ,,kona mín er þýsk".  ,,Talar hún íslensku?" spurði maðurinn ,,Reiðbeinandi" svaraði ég.  Það fannst honum allt annað mál, hún væri hluti af okkur. Ég veit hvað það skiptir miklu máli fyrir fólk sem til Íslands flytur að læra málið.  Er samt sleginn yfir hatri mannsins í garð útlendinga.  Nokkru síðar kom ég á félagsmiðstöð eldri borgara. Eftir æfingar sest fólk niður í kaffi til að spjalla um daginn og veginn. Deginum áður höfðu þrjár kínverskar konur fengið synjun á búsetu á Íslandi og þær hentu sér í götuna fyrir framan sjónvarpsmyndatökumenn RÚV.  ,,Hvernig fannst ykkur þetta"  spurði kona á tíræðisaldri. Það urðu kröftugar umræður, þar sem ráðandi skoðun var að vísa ætti þessum konum úr landi. Þá hvæsir kona á næsta borði: ,,Þið eruð helvítis rasistar. Fasistar"! Henni var bent á í rólegheitum að hún gæti tekið þátt í umræðunum, en hún brást hins vesta við. Þá hækkaði sú sem byrjaði umræðurnar róminn og sagði ákveðið; ,,Ég hef búið hérna í rúm tuttugu ár. Hér höfum við skipts á skoðunum, þangað til að þú komst hingað og leyfir þér að þagga niður í fullorðnu fólki". Hvæsrinn rauk út. ,,Hún er hluti af þessu góða fólki sem telur hlutverk að þagga niður í okkur hinum". 

Minnist þegar ég var að byrja koma til Þýskalands átti ég kost á að sækja fyrirlestra um nasismann. Þar var einmitt hatur og þöggun stórt atriði í öfgunum. Svo þegar ég fór til Austur Þýskalands fyrir hrun múrsins að vinna verkefni, kynntist ég því sama. 

Það þyrfti sennilega að búa til meðferðarúrræði fyrir kynþáttahatara og góða fólkið. Svo þetta lið geti verði til friðs.  

Athugasemdir

[Sigurbjörg Eiríksdóttir, 24.3.2024 kl. 16:25]

Gott innlegg 🌺

[Sigurður Þorsteinsson, 24.3.2024 kl. 18:36]

Sigurbjörg í Þýskalandi eru Jafnaðarmenn og Kristilegir jafnaðarmenn sammála um mikilvægi þess að vinna með öflugu lýðræði og lýðræðislegri umræðu til þess að berjast gegn öfgum. Þar er lagt áhersla á að fréttamenn t.d. í ríkisfjölmiðlunum séu ekki að blanda saman eigin pólitísku skoðunum t.d. í fréttum og fréttaskýringum, heldur virða hlutleysi. Því miður erum við í vondum málum hérlendis hvað RÚV varðar. Þeir segja að til þess að halda hlutleysi þurfi fyrst og fremst afburða fjölmiðlamenn. Hugsanlega hefur RÚV ekki efni á fólki í slíkum gæðaflokki. Þöggunin mótar jarðveg fyrir öfga og glæpi að grassera í.  Þá kemur að pólitískum flóttamönnum. Í endurmati sem flóttamenn hér á árum áður lögðu áherslu á var að hafa flóttamennina heldur færri en sinna þeim betur. T.d. varðandi tungumálið. Góða fólkið virðist leggja áherslu á þeim mun fleiri þeim mun betra. Einhverjir innan þessa hóps eru þó farin að fá kalda fætur. Skilaboðin frá Reykjanesbæ er algjörlega skýr, hvar sem fólk er nú í flokki. Sigurbjörg bestu kveðjur til ykkar í Suðurnesjabæ, það verður örugglega afar fallegt að sjá norðurljósin þarna suðurfrá í kvöld. 

[Ingólfur Sigurðsson, 26.3.2024 kl. 00:37]

Þetta er að sumu leyti arfaslakur pistill þar sem öllu er grautað saman á bjánalegan hátt. Af hverju gera Frakkar og Þjóðverjar kröfu um að innflytjendur þar tali frönsku eða þýzku og komast upp með það? Ríkið í þessum löndum gerir slíkar kröfur. Þar er sjónvarpsefni ekki aðeins textað heldur talað yfir enskuna!!! Ísland er minna málsvæði og meiri hætta á að málið tapist. Ergo: Meiri ástæða til að gera harðari kröfur hér um íslenzkukunnáttu.

Þessi samferðarmaður sýndi alls ekki hatur heldur gerði sömu kröfur og stórar þjóðir gera. 

Auk þess segir maður reiprennandi en ekki reiðbeinandi.

En að öðru leyti er ég sammála ýmsu eins og að þöggun eykur fordóma.

Einnig í síðara dæminu er ég sammála pistlahöfundi að betra er að ræða hlutina en að vera með stóryrði einsog að kalla þær fasista og rasista.

Það er EKKI rasismi að krefjast íslenzkukunnáttu af fólki. Rétt eins og eðlilegt þykir að aðkomufólk læri siði og venjur. Þar sem fólki er synjað um þjónustu eða kurteisi eða vinskap eða hvaðeina vegna kynþáttar er það rasismi. Fólk hefur þó og ætti að hafa frelsi til að bregðast þannig við. Ekki geta allir verið eins. 

[Sigurður Þorsteinsson, 26.3.2024 kl. 06:40]

Sæll Ingólfur. Það vill svo til að ég kenni m.a. íslensku fyrir útlendinga og er sannarlega sammála þér mikilvægi þess að nýbúar læri íslensku. Fyrir áratugum síðan flykktust Íslendingar til Svíþjóðar til þess að vinna. Allt of stór hluti þeirra lærði illa eða ekki sænskuna. Aðrir tóku sig til og töluðu reiðbeinandi sænsku. Margir Íslendingar mynduðu hópa þar sem að eins var töluð íslenska, þeir ætluðu bara að vera í nokkra mánuði og þá tók því ekki að læra tungumálið. Þetta er því miður viðhorf margra sem hingað koma. Við gerum þeim sem vilja læra ekki gott að reyna ekki að tala við þá íslensku, heldur færum okkur oft yfir í ensku. Það þýðir ekki að við eigum að sýna þeim hroka sem ekki tala málið. Einn Pólverji fékk í 60 ára afmælisgjöf frá börnum sínum það sem við köllum kröftugt íslenskunám og á 3 mánuðum varð hann skrambi góður. Talaði nánast ekkert áður. Vil ekki láta talsetja kvikmyndir eins og Þjóðverjar og Frakkar gera, en er alveg sammála þér að við eigum að gera miklu meiri kröfu um að þeir sem hér búi tali Íslensku, en gerum það af virðingu. 

[Helga Dögg Sverrisdóttir, 26.3.2024 kl. 09:46]

Það að við viljum að útlendingar á Íslandi sem ætla sér að vinna og búa hér tali íslensku er ekki hatur. Klént að nota orðið hatur. Þegar ég flutti til Danmerkur fékk ég starf í elligeiranum, er sjúkraliði, því ég gat tjáð mig á dönsku eða skandinavísku. Forstöðumaðurinn sagði að ekki væri hægt að ráða fólk sem gæti ekki talað við gamla fólkið. Hér á landi er þessi krafa ekki gerð. Gamall faðir minn er á Eir, fæ bæði horn og hala þegar ég kem þangað og útlendingar tala eigið mál í rýmum heimilismanna sem þau skilja ekki. Íslenska útlendu starfsmannanna er ekki góð, þó inn á milli megi finna einn og einn sem gerir sig skiljanlegan. Varð vitni að því um daginn að föður mínum var boðið kaffi á ensku. Eir hefur brugðist skyldu sinni að halda ekki vinnubundið íslensku námskeið fyrir starfsmenn sína.

það er á engan hátt dónaskapur að fara fram á að afgreiðslufólk í búð geti tjáð sig á íslensku. Ekki fullkomlega en þó þannig að viðskiptavinur skilji hann. Setja á þá kröfu á fyrirtækin að kenna þeim lágmarks íslensku, vinnutengda. Þar liggur oft hundurinn grafinn það er verið að kenna fólk allt mögulegt en ætti fyrst og fremst að kenna því vinnutengt og svo hitt.

Í grunnskólum er staðan þannig að útlendingar eru ráðnir til starfa, án þess að tala íslensku. Er það þróun sem við viljum sjá. Nei takk segi ég og hefur ekkert með hatur að gera. EKKERT. Hvaða málumhverfi er það fyrir barn í skóla hvort sem það er leik eða grunnskóli þegar íslenska er ekki töluð. En við eru sofnandi, gerum minni kröfur en mörg önnur lönd og það fer í taugarnar á fólk sem vill nota tungumálið sitt, íslensku.

Sama gamla tuggan virðist koma fyrir hjá mér varðandi móttöku flóttamanna, hatur. Nei það er ekki hatur að vilja takmarka fjölda flóttamanna til landsins svo um munar. Ungt fólk á í erfiðleikum með að koma sér þaki yfir höfuðið, þurfa á leigumarkaðinn. Ríkið ofbýður íbúðir fyrir flóttamenn þannig að það hefur áhrif á leiguverð. Íslendingar eiga að hámarki að taka um 50 manns á ári, aðlaga þá vel inn í íslenskt samfélaga. Kerfin okkar eru komin að þolmörkum og í reynd er skólakerfið sprungið í sumum sveitarfélögum.

Kröfu um íslenskukunnáttu þarf að auka. Gerum við það ekki munu þau aldrei leggja sig fram um að læra íslensku. Enginn fer fram á fullkomna íslensku en að þau geti gert sig skiljanleg og skilji það sem við þau er sagt á íslensku.

[Ingólfur Sigurðsson, 26.3.2024 kl. 13:14]

Ég nálgast ykkur alveg í þessu Sigurður og Helga. Þegar ég hitti útlendinga sem tala enga íslenzku nota ég enskuna, en eins og vinur minn einn sem einnig kennir útlendingum íslenzku í frístundum, þá reyni ég kurteislega að nota stuttar setningar á íslenzku sem eru algengar, en flóknari á ensku. Þá kemur oft í ljós að þau skilja eitthvað í íslenzku en vilja síður nota hana. Þetta kostar þolinmæði en einnig að ýta á þau með því að nota ekki alltaf enskuna.

Já, þessi pistill verður betri eftir því sem við ræðum betur um þetta og fleiri koma inní umræðuna. Gott innlegg hjá þér Helga.

[Sigurður Þorsteinsson, 26.3.2024 kl. 15:46]

Helga Dögg ef þú rifjar upp hvað ég skrifaði ..... og svo kom yfirgengileg ræða um útlendinga. Nú veit ég ekki til þess að neinir aðrir en hafði hlustað á það sem hann sagði. Á ekki von á því að þú hafir verið viðstödd. Fyrir mér var það hreinræktað hatur til allra útlendinga. Væri ekki prenthæft. Þú getur bara ekkert metið það klént eða ekki klént. Flokka þá niðurstöðu þína sem fljótfærnisvillu. Sem kennarar myndum við draga nemendur niður um ,5 eða einn heilan. Við getum flokkað útlendinga niður á margan hátt, en bara það eitt að flokka þá sem sækja um hæli sem pólitískir flóttamenn, mér skilst að beinn kostnaður vegna þeirra séu rúmir 20 milljarðar, og heildar kostnaður þá sennilega á milli 30 og 40 milljarðar. Um leið og vísa átti einhverjum úr landi varð allt vitlaust. Margir stjórnmálamenn vildu alltaf gera undantekningar og svo kom fjölmiðlaliðið. Að sjálfsögðu bitnar þetta síðan niður á öllum almenningi. Annars vísa ég til þess sem ég hef skrifað um mikilvægi þess að innflytjendur verði að læra íslensku um það erum við hjartanlega sammála. 

 

[Sigurður Þorsteinsson, 26.3.2024 kl. 15:48]

Helga og Ingólfur held að ef við myndum setjast niður og ræða málin yrðum við mjög sammála um flest hvað þetta varðar tiltölulega fljótt. Við verðum að nota gagnrýna hugsun.