Sóknarfæri!

 

Það er sannarlega mikilvægt að ná árangri í næstu kjaraviðræðum. Vilhjálmur Birgissonm verkalýðsforyngi á Akranesi hefur sett fram hugmyndir til þess að ná verðbólgunni niður, og undir það tekur Finnbjörn Hermannsson forseti ASÍ. Það er full ástæða til þess að skoða áhugaverðar áherslur. Það verða allir aðilar að koma að málinu. Atvinnurekendur, verkalýðshreyfingin, ríkisvaldið, sveitarfélögin og almenningur. 

1. Gera samkomulag um að gjaldskrá hækki ekki umfram ákveðið mark. t.d. 2,5%. Aðilar verða þá að hagræða til þess að ná settum markmiðum. 

2. Markviss stefna til þess að lækka húsnæðiskostnað þannig að unga fólkið okkar og þeir sem minna mega sín sjái möguleika á að fjárfesta í húsnæði án þess að þurfa að eiga fjársterka foreldra. Þarna þarf að lækka lóðaverð sem hefur hækkað á nokkrum árum úr því að vera 4 til 5% af húsnæðiskostnaði í að verða 25 til 30%. Gæluverkefni eins og Borgarlínu þarf að skera niður í eðlilega framkvæmd. Milliliðir þurfa að hverfa. Áhugaverðar hugmyndir um að lífeyrissjóðirnir komi að fjármögnun leiguhúsnæðis, eru áhugaverðar en þessa nálgun þarf að útvíkka til þeirra sem vilja kaupa fasteignir. Þá þarf að minnka kerfið þannig að tíminn sem þarf til þess að byggja muni styttast umtalsvert. Það eru til fleiri leiðir til þess að ná árangri á þessu sviði. 

 

3. Með þessum tveimur markmiðum verður hægt að hafa launahækkanir mjög hóflegar, enda stóru markiðunum náð. 

4. Aðilar vinnumarkaðarins taki sig sama til þess að koma í veg fyrir hækkanir á markaði. 

Þetta er að sjálfsögðu þjóðarsátt sem allir verða að koma að. Þjóðarsátt sem heimilin í landinu eiga skilið fá. Vilji er allt sem þarf. 

 

 

 

Athugasemdir

[Jón Atli Kristjánsson, 2.12.2023 kl. 12:39]

Góðar hugleiðingar Sigurður,

Verðbólga er skrítið skrímsli. Þrátt fyrir að við sem þjóð höfum gengið í gegnum mörg verðbólgutímabil höfum við lítið lært. Einn vandinn er breyskleiki mannsins, sumir græða á verðbólgu aðrir tapa. „ Innflutta „ verðbólgu höfum við engar varnir.

Mér finnst þitt innlegg gott og þeir verkalýðsleiðtogar sem eru á þessari línu eru meiri menn fyrir vikið.  Þeirra umbjóðendur fara alltaf illa útúr verðbólgu.

Seðlabankinn á að vera „ verðbólgu bani. Í staða þess að reka seðlabankastjórann, væri meiri mannsbragur  verkalýðsleiðtoga að setjast niður með bankanum og fjölga þeim úrræðum sem bankinn hefur.

[Guðmundur Ásgeirsson, 2.12.2023 kl. 15:02]

Nú standa mörg heimili frammi fyrir stórhækkuðum húsnæðislánavöxtum. Þeim fer fjölgandi eftir því sem fastir vextir losna á fleiri lánum og það mun halda áfram næstu misseri. Eins og hefur lengi verið varað við er stór þeirra sem ráða ekki við þessa hækkuðu vaxtabyrði að færa sig úr óverðtryggðum lánum yfir í verðtryggð. Skiljanlega neyðast mörg til þess þó það sé ekki léttvæg ákvörðun. Þau sem eru með lán hjá bönkum ættu að nota tækifærið þegar þau endurfjármagna og færa lánin frá bönkum til lífeyrissjóða sem þau eiga lántökurétt hjá. Hver einasta króna sem væri þannig greidd upp af lánum bankanna myndi hverfa úr umferð og draga þannig stórlega úr þrýstingi peningamagns í umferð á verðbólgu. Þar sem vitund um þennan eiginleika peningakerfisins er ekki á allra vitorði þyrftu verkalýðsforingjar og aðrir sem ná eyrum almennings að koma skilaboðum um þetta á framfæri svo eftir því sé tekið.

[Sigurður Þorsteinsson, 2.12.2023 kl. 16:11]

Jón Atli þú ert ekki bara hagfræðingur heldur með mikla reynslu og visku. Það er mikið rétt að í mikilli verðbólgu færast fjármunir milli stétta. Unga fólkið okkar, margir eldri borgarar og þeir sem minna mega sín tapa mestu. Þetta vita þessir eðalmenn Vilhjálmur Birgisson og Finnbjörn Hermannsson. Þeir vilja berjast fyrir þá sem eru að verða harðast fyrir högginu. Það er algjörlega óásættanlegt að aðeins það unga fólk sem á ríka foreldra geti eignast sitt eigið húsnæði. Efling stéttarfélag spyr líka í auglýsingum hvort við viljum að aðeins hluti þjóðfélagsins geti komið sér upp húsnæði. Atvinnurekendur, ríkið og sveitarfélögin eiga að taka undir með Vilhjálmi og Finnbirni og gagna til samninga með þessum áherslum.    Guðmundur ég  vann á sínum tíma við Ráðgjafastöð Húsnæðisstofnunar þegar svokölluð greiðsluerfiðleikalán komu til sögunnar. Það eru til margar leiðir til þess að mæta þessu ástandi. Til eru lausnir á þessu vandamáli. Það gæti verið hluti af þessum samningum, en ætti auðvitað að fara í gang miklu fyrr.  

[Sigurður Þorsteinsson, 2.12.2023 kl. 16:33]

Bara að það sé sagt þá hef ég líka farið yfir mál með listafólki, bæði í tónlist, myndlist og fl. Staða þeirra er vond. Jafnvel jafn slæm og hjá sauðfjárbændum.